I te mau hepetoma ato’a, ‘aita te tā’atira’a Ordre de Malte e ‘ere nei, nō te fa’aineine ‘e te fa’atāmā’a i te feiā nohora’a ‘ore, teie te ārea 60 rātou e haere tāmau mai nei.

Nō teie ra haerera’a, mea huru rahi a’e te ta’ata tei tāpapa mai, e riro ra ‘ua hau i te hānere 20. Te tumu, te ‘ōro’a fānaura’a ia.

I te reo ‘o Florent Roy, te ra’atira nō te tā’atira’a Ordre de Malte, « nā mātou e fa’atāmā’a i te mau pō mahana toru ato’a, nō te ‘ōro’a noera, ‘ua tūra’ihia mai. Mea hau atu i te fa’ahiahia te mā’a i fa’aineinehia, te huru fa’ari’ira’a ia rātou, e te vai ato’a ra te pūpūra’a ō ».

15 matahiti i te tāvinira’a, ‘e ‘aita e mutura’a. I tāua nei pō, e pūa’a toro te mā’a, tāpirihia mai te pipi, te ‘ūmara ‘eu, fa’aineinehia e hō’ē hotēra nō te fenua nei. Nō te mau ō, te vai ra te mau tūru’a ‘e te mau ‘ahu ta’otora’a a hō’ē taiete manureva nō te fenua nei.

Nō teie pō ta’a’ē, ‘ua tārenahia hō’ē pupu hīmene. « Te tahi mau hīmene noera nō te ‘āfa’i mai te tahi ‘oa’oa nō rātou no te mea e orara’a fifi tō rātou. Nō rātou mai i te māfatu te hia’ai e haere mai e hīmene i te mau hīmene noera », i te paraura’a a Raiamana Teauroa, mero tauturu nō te tā’atira’a Ordre de Malte.

Tau matahiti i teie nei tō Père Christophe ha’ara’a nō te tauturu i teie mau taea’e. Ia au i te mau nūmera hōpe’a, piri rātou i te 6 hānere ‘e ‘aita e nohora’a.

« Te itehia ra te mau ta’ata ‘āpī, te mau ta’ata i mātauhia ‘e te mau ta’ata pa’ari roa atu e mea maoro te orara’a i roto i te mau aroā. Te vai ra ‘e’ita e maoro mai… Rāve’a ato’a teie nō te fārereira’a ia rātou, nō te mea te vai ra i rotopū ia rātou ‘aita e pāpū ra te terera’a, nā mātou ia e tauturu », i te reo o te metua vārua nō te tātētara nō Pape’ete.

‘E’ita ‘e ‘ore, ‘ua tā’oto maita’i rātou i muri a’e i te tāmā’ara’a. E tāmau ā te Ordre de Malte i tāna mau tauto’ora’a. ‘Āre’a ra ia Père Christophe, te ‘imira’a ia i te rāve’a e ‘ia fa’a’āpīhia te parau fa’a’aura’a a te taote manava tei hope.