‘E’ita e ‘ore hō’ē teie o te mau ti’a pāruru mātau-roa-hia a’e i te fenua nei. ‘Ua pohe ‘o François Quinquis i te 71 ra’a o tōna matahiti nā roto i te ma’i.

Fānauhia ‘ona i te tuha’a nō Rennes i te fenua Farāni, i reira tōna haerera’a i te ha’api’ira’a ture. I te ārea matahiti 80 tōna taera’a mai i Tahiti nei, e piti taime tōna mā’itira’ahia ‘ei peretiteni nō te mau pāruru.

Nō tōna ‘aravihi, ‘ua riro mai ‘ona ‘ei pāruru nō te hau fenua hou a riro mai ai ‘ei pāruru nō Gaston Flosse i te roara’a 30 matahiti. ‘Ua pāpa’i ato’a ‘ona hō’ē puta « Gaston Flosse, chroniques d’un destin hors du commun » i ni’a i te peretiteni tahito nō Pōrīnetia Farāni o tāna i mātau maita’i, tei mātara i te ‘āva’e māti i mā’iri a’e nei.

Te fa’atae nei o TNTV i tōna tāpa’o nō te aroha ‘e te tāmahanahana i te ‘utuāfare ‘ati.