Tāpati ‘ā’ahiata 10 nō ‘ātete tō Yves Haupert fa’aru’era’a mai, ‘āua fa’a’atihia e tōna ‘utuāfare feti’i. Nō te ma’i, ‘ua mau na ‘oia i te fare ma’i tau mahana hou a fa’aho’ihia atu i tōna nohora’a.
I te ‘oire nō Strasbourg tōna fānaura’ahia i te matahiti 1962. ‘Ua haere i te ha’api’ira’a nō te ture ‘e nō te ‘ihi poritita.
E pāpa’i ve’a i terā ra tau i RFO, ‘ua rautī ato’a i te ve’a reo farāni i RFO Guadeloupe, Guyane hou a tae mai ai i te fenua nei i te matahiti 1992.
‘Ua ha’a ato’a ‘ona i pīha’i iho i te mau ti’a poritita, ‘ua fa’aoti e vaiho i tōna ti’ara’a pāpa’i ve’a . Mai te matahiti 2000-2005, nā na i ti’a’au i te tuha’a o te ha’apārarera’a parau a te fa’aterera’a a Gaston Flosse.
‘Ua rohi ato’a ‘ona nō te ha’amaura’a i te pu Tahitienne de presse i te matahiti 2001. Hō’ē ato’a teie o te mau ti’a tei pāpa’i fa’ahou i te papa ture ‘ōtōnōmī.
I te ta’ahurira’a te fa’aaterera’a a Gaston Flosse, ‘ua vai noa o Yves Haupert i roto i te orara’a poritita.
Mai te matahiti 2007 tae atu i te matahiti 2013, nā na i fa’atere mai ia TNTV. ‘Ua ha’amaita’i atu ā ‘ona i te ha’apūrorora’a i te mau hōho’a tāvirihia i te fenua nei.
I te matahiti 2010, ‘ua anihia ia Yves Haupert ‘ia ‘imi i te rāve’a ‘eiaha te taiete ‘ia ‘opani.
« ‘Ua ani mātou iana ‘ia fa’aitihia te rave ‘ohipa, ‘ia fa’aitihia te mau ha’amāu’ara’a. E nehenehe e parau, te mau ‘ohipa e tupu ra i teie mahana i roto i te ti’a’aura’a i te ‘āfata teata, nō ni’a mai ia i te mau ‘ohipa i ‘ōpuahia e Yves Haupert. Terā huru tōna, piri i te ta’ata. ‘Ua ‘ite maita’i ‘ona te huru o te mā’ohi nō te mea ‘ua ora māoro mai ‘ona io tātou nei, ‘ua tupu teie ‘ohipa nā roto i te hau », i te reo o te peretiteni tahito Edouard Fritch.
Matahiti 2018-2021, i te piha ‘ohipa nō te fa’aturera’a nō te moana tōna ha’ara’a. Ti’ara’a tei mauhia mai e ana i muri a’e i te manuira’a i te tata’ura’a a te mau rave ‘ohipa a te hau.
I te matahiti 2024, ‘ua nōmino-fa’ahou-hia ‘ona nō te fa’atere ‘āmui ia TNTV e o Karl Tefaatau. Nāna e ha’apa’o i te tuha’a nō te parau ‘āpī ‘e te mau tāpura ha’apūrorora’a hōho’a.
« ‘Ua mana’o vau e ‘ohipa tano teie, e 2 ta’ata nō te fa’atere i teie ‘āfata teata, nō te mea terā tā te mau rave ‘ohipa i ani mai. ‘Ia arata’ihia rātou e te hō’ē ta’ata tā rātou i matau maita’i. Terā tā Yves i ‘āfa’i mai, te hau. ‘Ua au ato’a vau i tōna ti’ara’a pāpa’i ve’a, ‘aravihi mau, ta’ata pāpa’i puta ato’a. ‘Ua ha’apūroro ato’a hō’ē hōho’a i ni’a i te va’a. Ta’a’ē tōna vaira’a, ‘ua vai pāpū noa oia i roto i tōna orara’a », i te reo o te peretiteni Moetai Brotherson.
« ‘Ua riro oia ei taipe nō te paraparau ti’amā. Te parau ti’a. Te parau ti’a tāna i fero nā i roto i tōna ‘ā’au. E ‘aivāna’a teie. Rave rahi ta’ata e mihi i tōna revara’a, ‘eiaha vau ana’e, e mihi te tā’ato’ara’a o te mau rave ‘ohipa i tōna mo’era’a », i te reo o Karl Tefaatau, fa’atere o TNTV.
I roto i te raura’a o te mau ‘ohipa i ravehia mai e Yves Haupert, tei ha’amaura’a ia i te ho’era’a « Serge Hoatua ». E 3 puta tei pāpa’ihia e ana i ni’a i te orara’a poritita nō te fenua nei.
E hunahia te tino ‘o Yves Haupert i te mahana maha 14 nō ‘ātete 2025.
