‘Ua ha’amata te mau tamari’i haere ha’api’ira’a i Tahiti nei i te fa’aho’ihia io rātou. Te mata ‘ata’ata, ‘ua ineine nō te reva. ‘Eaha ho’i e ‘ore ai, te ho’i nei i te fenua ‘āi’a, i pīha’i iho i te ‘utuāfare feti’i. Nō te rahira’a o rātou mai ‘ātete mai ā te vaiihora’a i tō rātou mau metua.
« Te ‘oa’oa nei au i te ho’ira’a i Makemo. Te ta’a’ēra’a e te ‘utuāfare ‘e’ere i te mea ‘ōhie », i te reo o André Maifano, pīahi.
– PUBLICITE –
Nō te fa’aineine i te mau rerera’a, 58 tere tei tārenahia e te taiete Air Tahiti nō teie tau fa’afa’aeara’a ha’api’ira’a. I te roara’a o teie hepetoma, tauatini ti’ahapa tamari’i o te utahia.
« Nō teie hepetoma, e piri i te 1700 pīahi o te ho’i i pīha’i iho i tō rātou feti’i », i te reo Vetearii Yieng Kow, rave ‘ohipa a te taiete Air Tahiti. « E pu’e tau faufa’a roa teie nō mātou, nō te mau tamari’i ‘e te mau ‘utuāfare feti’i. I te roara’a o te matahiti ha’api’ira’a, piri i te 10 tauatini pīahi o te utahia », i te mau ha’apāpūra’a a Moearii Darius nō te taiete manureva.
I te taime a tau atu ai te manureva i ni’a i te tahua taura’a, rahi atu ā te ‘oa’oa i te fārereira’a te tahi i te tahi. Tano maita’i nō teie mau ‘ōro’a matahiti e piri mai ra.
« ‘Oa’oa roa vau, a tahi ra ‘ona a ho’i mai ai », i te reo o Temarii Tekurio, metua tāne. Hō’ēā ato’a ta’ira’a reo nō te tahi atu pāpā nō Hikueru ‘e te mata ‘ata’ata, « ‘oa’oa rahi nō te mea ‘ua tae mai te mau tamari’i, ‘ua tae ato’a mai tā’u tamahine. ‘Oa’oa rahi. E nehenehe e parau, mea ‘ōhie te ‘ohipa i fa’anahohia mai nō te mau tamari’i ».
Nō te rahira’a o rātou, mea tamari’iri’i noa ra ā, fa’ahepohia e haere i te ha’api’ira’a i te vāhi ‘ē. « Mea fifi ato’a nō te mau tamari’i i te haere mai i Makemo nei, ‘oa’oa ato’a ra rātou i te haere mai i te ha’api’ira’a. ‘Ia tae ra i te taime ho’ira’a, ‘ua rahi atu ā tō rātou ‘oa’oa », i te reo o Minie Temarii, ti’a ha’apa’o i te fare ha’api’ira’a tuarua nō Makemo.
« E mea fa’ahiahia roa, e tāmarū maita’i au i tō’u tino nō te mea, mea rohirohi ato’a te ha’api’ira’a. E tāmarū maita’i au ia’u ‘ia vai ineine nō te ha’amatara’a ha’api’ira’a », i te ha’apāpūra’a a Kaukea.
‘Ua riro teie fa’anahora’a a te fa’aterera’a o te mau ha’api’ira’a ‘e te taiete manureva Air Tahiti ei rāve’a tano mau nō te nati i teie mau pīahi ‘e tō rātou mau ‘utuāfare, ‘ia nehenehe rātou e fārerei fa’ahou.
