‘I Paea nei, 80 tamari’i mai te 3 haere atu i te 12 matahiti tei fa’ari’ihia i roto i te mau fa’ana’anataera’a fa’anahohia e te mau rautī. Mau tamari’i nō te mau ‘oire nō Pape’ete, Fa’a’a, Puna’auia ‘e Paea, te rahira’a nō roto mai i te mau aroā fifi. “Terā mau tamari’i, ‘aita tō rātou fa’anahora’a i te fare. Haere ihoa ia mātou e fārerei i te mau māmā ‘e pāpa, nā mātou e rautī ia rātou i roto tera ‘āva’e tiurai. E nehenehe au e ha’apōpō ia mātou nō te mea terā mau tamari’i, ‘ua pa’ari rātou ‘ī’ō nei. Ha’amata rātou i te 3 o te matahiti haere roa i te 17 matahiti. Te vai ra, tei haere i Tautira. ‘Aita e fifi, te vai ra te mea ‘āpī e fa’ari’i ihoa mātou” , i te reo o Teuru Pita, vahine ha’apa’o tauiha’a i te pū Tārevareva ‘e rima tauturu nō te tā’atira’a.

I teie pū tītauhia i te metua rave ‘ohipa e mara’a ia rātou i te ‘aufau, 43 tauatini farāne hō’ē tamari’i. ‘Āre’a nō te mau tamari’i e fāna’o nei i te tauturu nā te fare turuuta’a, e amo te reira i te utara’a ‘e te mā’a nō teie ‘āva’e fa’afa’a’eara’a ha’api’ira’a. Te mau tamari’i fa’ari’ihia i Tautira, tei ni’a atu te tārifa, ‘e te mau tamari’i i tere atu i Mātuita ‘aore ra i Fakarava, ‘ua hau ri’i te 100 tauatini farāne nā ni’a i te tamari’i. ‘Ia ‘āmuihia nō teie tau fa’afa’aeara’a ha’api’ira’a, 280 tamari’i i tāpa’ohia i te tā’atira’a FSCF, te ‘āmuitahira’a nō te tū’aro ‘e te peu tumu nō Farāni tī’a’auhia e te fa’aro’o tātorita.

A 40 matahiti teie nei teie tā’atira’a i te ‘īritira’ahia i Pōrinētia nei ‘e ‘aita atu tāna fā maori ra te fa’ari’ira’a i te mau tamari’i i roto i te mau fa’a’ana’anataera’a rau, fa’aineine te mau taure’are’a i ni’a i te mau ti’ara’a rautī tamari’i. E hau atu, te ha’apa’o ato’a nei teie tā’atira’a te fa’a’ana’anataera’a o te mau tamari’i e pūhapa nei i roto i te mau fare ha’api’ira’a nō Tahiti ‘e ‘aita tō rātou mau metua fa’ari’i ‘ī’ō nei. Mā te ‘ore e  hi’o i te fa’aro’o a terā ‘e terā tamari’i.

Nō teie pupu tamari’i, te rahira’a o te mau rautī e mau rima tauturu ia, vetahi tei roto i te ha’apa’arira’a i te tōro’a rautī ‘aore ra ti’a fa’atere. I roto i te mau fa’a’ana’anataera’a rau i fa’ata’ahia teie mahana, tē vai ra te ha’unera’a ‘ete ‘e te ha’api’ira’a i te tamari’i ‘ia ‘amu i te mā’a tupu. “ Tā mātou ra ‘e tāpe’a, te parau ia nō te fa’aha’utira’a i te tino, horohoro. Te reira tā ratou, ha’uti te pōpō. Fa’ature ihoa ia te ha’utira’a. I teie mahana, nō te ha’amāuruurura’a ia rātou, te vai ra tā mātou vāhi hopura’a pape”, ha’apāpūhia mai e Teuru Pita rima tauturu a te tā’atira’a.     

Maoti tāna ‘ōpuara’a ha’api’ira’a, 300 rima tauturu i fa’aineinehia e teie tā’atira’a i teie noa matahiti i ni’a i te mau ti’ara’a rautī ‘aore ra fa’atere nō te hō’ē pū fa’ari’ira’a tamari’i.