E mero o Pōrīnetia Farāni e te fenua Taratoni nō teie nei ‘āmuitahira’a mai te matahiti 2016, ‘aita ra i fa’atupu a’e nei teie nei rurura’a rahi io rāua. Nō te taime mātāmua roa, e tupu te reira i Tahiti i te matahiti 2031 i ni’a i te anira’a a Moetai Brotherson.
Anira’a tei fa’ari’ihia e nā peretiteni ‘e fa’atere hau nui mātāmua 17 i roto i tā rātou rurura’a ta’a’ē i te motu nō Munda, 1 hora i te ātea ‘ia Guadalcanal, nā ni’a i te manureva. E ho’i mai rātou i Guadalcanal nei i teie tahara’a mahana.
– PUBLICITE –
Mea tārena-ātea-hia te « Forum », mea fa’a’ohu nā ni’a i te tā’amura’a o terā e terā fenua, Pōrīnetia, Meranetia e Mitoronetia. ‘Ua tupu te reira i Tonga i te matahiti i mā’iri a’e nei, fenua Toromona i teie haerera’a, Palau i te matahiti i mua ‘e i Aotearoa i te matahiti 2027. Vetahi taime e taui, ‘ei hi’ora’a, ‘ua ani o Vanuata e nā na e fa’ari’i i teie rurura’a i te matahiti 2030 nō te 50 ra’a o te matahiti o tōna ti’amāra’a.
Nō te mau ha’amau’ara’a, nā te fenua fa’ari’i e amo, turuhia e te « Forum ». O Auterāria ‘e Aotearoa te mau ‘ona rahi roa a’e nō teie ‘āmuitahira’a.
E fā rereira’a tīa’ihia te Forum i te mau matahiti ato’a, piri i te 100 pāpa’i ve’a o tei tāpapa mai a ta’a noa atu te mau tā’atira’a, te tōtaiete tīvira ato’a.
