Mea fano ti’a tāua iāti ra i te fenua ‘Auterāria. E terera’a matauhia terā e te mau pahī mai te mau fenua marite ‘apato’a nō te haere atu i te pae ‘Auterāria mā.
Hō’ē ta’ata Horāne ‘e Heremani tei tāpe’ahia. I te faitora’a, piri i te tane rahira’a cocaïne ‘e ice tei ‘itehia i roto i te mau hi’opo’ara’a a te mau mūto’i.
Nō Benoit Kautai, te haka’iki nō Nuku Hiva, hepohepo i te fa’aro’ora’a i tāua parau ‘āpī ra. « Mana’o mata’u ato’a, a riro teie mau rā’au ta’ero i te ho’ohia nā tō mātou mau motu. Te pāruru ato’a ra mātou i tā mātou mau tamari’i ‘e te huira’atira. ‘E’ere ato’a nō te henua ‘enana noa, nō Pōrīneti’a tā’ato’a ra ». E’ere a tahi nei utara’a mai teie te huru a ‘itehia ai i Matuita mā. « Mea pāpū teie te rēni e ravehia nei e te feiā hō’o rā’au ta’ero ».
E fārerei te mau haka’iki i te fa’aterehau nui nō te aramoana, Manuel Valls a mahana maha. E tu’u ato’a rātou i teie tumu parau i mua iana. « ‘Aita mātou e fa’aea i te ani i te hau nui ‘ia ha’apa’arihia te hi’opo’ara’a i teie mau pahī e tere mai nei io mātou. Teie te mau ‘āva’e e haere rahi mai e te mau iāti i roto i tō mātou mau ‘ō’o’a », i te reo o te tāvana Benoit Kautai.
E fa’aho’ihia mai te rā’au ta’ero i Tahiti nei hou a tu’uhia atu ai i roto i te mātini nō te tūtu’i iana.
