Ia au i te mau aupupu pāruru, 80% o te mau rave ‘ohipa a te Fare Tauhiti Nui tei fa’aea i te ‘ohipa i teie mōnīre nei. 13 anira’a i ni’a 16 tei tu’uhia e te aupupu tei pāhonohia.
‘A tīa’i noa atu ai e ia hō’ē te mau mana’o i ni’a nā anira’a e 3 e toe ra, taupupū te mana’o o te feiā ‘ori ‘e te feiā hīmene i ni’a i tupura’a o te Heiva i Tahiti tāpurahia mai te 3 nō tiurai. Noa atu te rohirohi, te ti’aturi noa ra vetahi e tupu ihoa teie tata’ura’a. « Hepetoma i mā’iri a’e nei, ‘ua ‘ohipa mai na mātou haere roa i te hora 3 i te ‘ā’ahiata, hora 5 atu, e teie te mahana hōpe’a, ‘aita ihoa ia mātou i tā’oto, ha’apa’o ao. Mana’o taiā, mana’o fifi ato’a nō te mea ‘ua rohi mai mātou a 6 ‘āva’e i teie nei. E faufa’a moni rahi tā matou i tu’u i roto i te fa’aineinera’a o te Heiva, te ti’aturi ra mātou, e ‘ori ihoa mātou i te 3 nō tiurai », i te reo hepohepo ‘o Loic Tehaeura, te ra’atira pupu ‘ori Hei Tahiti, tāpa’ohia i roto i te tuha’a Hura Tau.
Aita ato’a e nehenehe ‘e fa’a’ore, rave rahi mau tino ‘ori nō te ara tei tāpapa mai i teie tata’ura’a. E moni rahi ato’a tā te mau pupu i pau nō te fa’aineine i te feiā ‘ori ‘e te feiā hīmene. « ‘Āraua’e mātou e fa’aineine fa’ahou ai tā mātou mau hīmene. ‘Aita mātou e fa’atopa i tō matou mōrare, ‘ia vai ineine noa ra. Te taime e parauhia mai e, ‘ua fa’aea te tata’ura’a, ‘ua fa’aea ihoa ia. ‘Aita ihoa ia e rāve’a. Tē parau ra nō te itoito, te itoito noa ra mātou. ‘Aita i fa’aea te itoito. Ia’u, te turu ato’a ra vau ia rātou nō tō ratou ‘ānanahira’a ‘e nō te ‘ānanahira’a ato’a o te Heiva. ‘Ia tupu noa, ‘eiaha te Heiva ‘ia mou », Pierrot Faraire, te ra’atira pupu hīmene Tamariki Rapa e tomo nei i roto i te tuha’a tārava tuha’a pae.
31 matahiti i teie nei tō Pierrot Faraire ta’ahira’a ti’ara’a i te Heiva, i teie mahana, ‘ua ta’u i te mau vārua ‘ia tupu ihoa teie fārereira’a. « Hōtaratara nō te mea e tahua teie mātauhia e au. Mātauhia e au e haere mai i ni’a i te tahua e fa’a’ite i te parau nō te hīro’a tumu, te ‘ori ‘e te vai atu ra. Hōtaratara ato’a, te vai ra hō’ē ‘ohipa tei tau mai i ni’a iho ia’u. Nā’o noa ihoa ia vau, te mau tupuna paha ia, tei tau mai i ni’a ia’u nō te parau ē, ‘ia tupu ihoa teie Heiva. Tē ti’aturi ra vau e fa’atupuhia ihoa teie Heiva. Tīa’i atu, tīa’i atu tātou », i te reo ti’aturi ‘o Pierro Faraire.
11 pupu ‘ori tahiti ‘e 12 pupu hīmene tumu te tīa’ihia i To’ata i teie matahiti. Tāpurahia te mau ‘āru’i heivara’a mai te 3 tae atu i te 19 nō tiurai, te ‘ōro’a o te rāhiri tei tārenahia nō teie mahana maha, pa’i’uma mai ai te pupu hīmene Tamari’i Tepeti nō Pare Nui ‘āpe’ehia mai e te pupu Pape Ora nō Papofa’i, ‘e nā te pupu ‘ori Hei Tahiti e fa’ahope i te ‘āru’i mātāmua o te Heiva i Tahti 2025.
