Piri i te hora 10 i teie po’ipo’i, te tomo mai nei nā va’a tau’ati i Te ava mo’a. 50 matahiti i muri mai, te tāmau noa nei ā o Hōkūle’a i teie tere. I teie nei mahana tei te marae Taputapuātea nei ‘oia. Rahi tō Ra’iātea tei tāpapa atu i teie nei ‘ōro’a fa’ari’ira’a.

« 16 matahiti tō’u i te haere mātāmuara’a mai o Hōkūle’a. Puta pū te ‘ā’au i teie nei mahana », ‘ia fa’aro’ohia atu. « E mahana rahi teie, ‘ua tae rahi mai te ta’ata, te feiā ‘āpī ato’a. Rāve’a nō te nati-fa’ahou-ra’a ia tātou ».

I te ‘ōmuara’a nō te ‘āva’e tiunu tōna fa’aru’era’a ia Hilo, nō te fano ti’a mai i tō tātou mau motu. Te ‘avei’a « Kealaikahiki » tei ravehia e ana, ‘āpe’ehia i roto i teie tere e Hikianalia. Mai reira mai, 5 370 kirometera tei rāterehia mai e te mau ‘ihitai mā te fa’a’ohipa i te mau feti’a nō te arata’ira’a ia rātou. Te ‘oa’oa nei te tapena Nainoa Thompson i te ho’ira’a mai i te ‘utuāfare nei.

« E ‘ā’au mehara i te ta’ahi-fa’ahou-ra’a te ‘āvae i’ō nei. E faufa’a rahi o Taputapuātea nō’u« , i te reo o Nainoa Thompson.

Nā te ta’i o te mau pū, te ‘oto o te mau hīmene, te ‘ori, te ‘ōro’a ‘ava, te mau horomoana i te fa’ari’ira’ahia. O André Maramatoa tei mā’itihia e te tōmite to’ohitu nō te arata’i i te fa’ari’ira’a i ni’a i te tahua marae.

« I te tere mātāmua, i te taera’a mai ‘o Hōkūle’a i teie vāhi, te vai ra te mau metua, tō’u pāpā fa’a’amu. I teie nei mahana, o vau tei ti’a mai. Puta pū te ‘ā’au nō te mea, te pae ‘ahurura’a matahiti teie« .

A mahana mā’a, e fa’aru’e te mau va’a tau’ati ia Ra’iātea nō te fano ti’a mai i Tahiti. I Pā’ofa’i ato’a, e ‘ōro’a hanahana tei fa’aineinehia nō rātou.