Maita’i te reva i te fa’aru’era’a mai ‘o Fa’afaite i te ao mā’ohi i te uahu o Vaitupa inanahi nei. E mau ‘ihitai fa’aineinehia nō hō’ē tere mai teie te huru. ‘Ua ‘ahu mai i tō rātou piriaro re’are’a ‘e te hei upo’o ato’a nō vetahi. ‘Ua ‘āmui ato’a atu te mau hoa ‘e te mau feti’i nō te fa’afa’aitoitora’a ia rātou i roto i teie tere « ‘a fano a u’i ».

« E tere fa’ahanahanara’a i te mau tupuna. I mūta’a iho, ‘ua fano mai tō tātou mau tupuna nā te Moana Ātea nā ni’a i to rātou mau va’a moana, ‘ua tāpae i ni’a i te mau motu ātea māoti tō rātou ‘ite, tō rātou ‘aravihi ‘e tō rātou māramarama », i te reo o te tā’atira’a Fa’afaite i te ao mā’ohi.

E tere ato’a ra teie nō te ‘āpe’era’a i te arati’a o te va’a tuiro’o ra ‘o Hōkūle’a nō te fa’ahanahanara’a te pae ‘āhurura’a o te matahiti a fano mātāmua mai ai i Tahiti nei. Hōkūle’a, « tei fa’aiho fa’ahou mā te fanora’a ia au i te ‘ite ‘e te māramarama o tō tātou mau tupuna », i te reo o te tā’atira’a.

I teie haerera’a e ‘āpe’ehia te va’a Vaihī e te va’a Hikianalia i roto i te tā’ato’ara’a o tōna tere . I Ra’iātea nā va’a e toru e fārerei ai nō te ‘ōro’a fa’ari’ira’a i ni’a i te marae Taputapuātea, tāpurahia i te 23 nō tiunu 2025. ‘Āre’a ra i Tahiti nei, e tupu te reira i te 28 nō tiunu 2025 i Pā’ofa’i.