Nō te rū i te fa’a’ī i te pūtē toto, ‘aita atu tā te mau tuati ma’i e rāve’a, te tere-roa-ra’a i roto i te mau ‘oire nō te fa’ari’i i te mau ta’ata e ‘ōpua ra e pūpū i tō rātou toto, mai i’o nei, i Mahina.
«Teie ‘ohipa tā mātou nō te fa’aora i te mau ta’ata ma’i i Pōrīnetia nei. Te tumu ia o tō mātou tere i Mahina nei. Mai te mea nō Mahina nei ‘outou, a haere mai e hōro’a i tō ‘outou toto », te pi’ira’a teie a Vaiana Manutahi, tuati ma’i.
– PUBLICITE –
Nō teie fārereira’a, ‘ua hau i te 30 ta’ata tei ‘āpe’e i te mau fa’auera’a a te mau tuati.
«‘Ua haere mai au nō te mea ‘aita vau i hōro’a i tō’u toto mai te matahiti 2012. E nō te mea e toto 0+ tō’u, mea varavara roa, mea faufa’a i te tauturu i te feiā ma’i», i te reo o te hō’ē vahine pūpū.
Hō’ēā ato’a mana’o nō te tahi atu vahine tei tāpapa ato’a mai, « mea tupu maita’i, ‘ua matau vau i teie fa’anahora’a. Mai te matahiti 2014, tē hōro’a nei au i tō’u toto. ‘E’ere i te mea taiā. ‘Ua ‘ite te mau tuati i tā rātou ‘ohipa. ‘Ua fāna’o na tō’u tuahine i te toto hou ‘a fa’aru’e mai ai ‘e mai taua taime ra tō’u hōro’a-noa-ra’a i tō’u toto ».
I mua i te rahira’a o te feiā ma’i e fa’ari’ihia nei i te fare ma’i nō Taaone, ‘ua topa roa te faito o te mau pūtē toto.
I te mau ha’apāpūra’a a te tāote Julien Broult, ra’atira nō te pū ‘īritira’a toto, « te tanora’a, e 200 pūtē toto tā mātou e ha’aputu nei, nā roto ra i te mau anira’a i te mau hope’a hepetoma ‘i ma’iri a’e nei, ‘ua iti roa mai te reira. Tītauhia e faa’ī, mea rū. Mai teie po’ipo’i, 30 ti’ahapa rātou tei hōro’a i tō rātou toto, e nava’i noa nō teie hope’a hepetoma ».
‘A ta’a noa atu i te terera’a i roto i te mau ‘oire, e vai matara te ‘ūputa o te pū ‘īritira’a toto mai te monirē e tae atu i te mahana pae i te tahua piti o te fare ma’i nō Taaone.
