‘E’ere i te maere nei nō te mau mero nō te tā’atira’a Māmā Nātura. I roto noa i te ārea 2 hora, tai’ohia hau i te 400 putu uira i fa’aho’ihia mai i te pae tahatai, i te ‘āua Vaira’i. E mea pe’ape’a, inaha e vāhi haerehia teie e te huira’atira nō te tāmarū i te tino ‘e ‘aore ra nō te hopu i te miti.

« ‘Ua fa’a’ite a’e na mātou te ‘ohipa e tupu ra, ‘aita ra e tāu’ahia« , i te hi’ora’a a Adeline Yvon, peretiteni o te tā’atira’a. « E ara, nō te mau tamari’i e fa’aea ra nā pīha’i iho mai, tē haere mai nei e hopu i te miti, tae noa atu i te mau metua ‘ia haere e hī i te i’a. Te vai ra te mau rā’au ta’ero i roto i te mau putu uira. Mea fifi roa ».

Nō teie nei fa’anahora’a, turu-pāpū-hia te tā’atira’a e te feiā hopu ‘ōpūpū nō Puna’auia. Nā te ‘oire nō Puna’auia e ti’a’au i te fa’ateara’a i te mau pehu i ‘ohihia mai.

« A hi’o mai na, ‘ua pē roa teie mau moiha’a. E ani mātou i te hau fenua, ‘ia fa’ata’a mai i te mau vaira’a pehu e tano », i te reo o Mahai Ly, ti’a ha’apa’o i te fa’ata’ara’a pehu i te ‘oire.

448 ‘āfata putu uira ‘e 515 kiro pehu tei fa’aho’ihia mai e te mau mero nō te tā’atira’a i teie po’ipo’i mahana maha.