Te’ote’ora’a rahi tō te peretiteni Moetai Brotherson i te fa’a’itera’a mai e ‘ua ‘āifaito te vahine ‘e te tāne i roto i tāna fa’aterera’a hau. E piti vahine ‘āpī o te ha’a atu i pīha’iho ‘iana, ‘o te taote Raihei Ansquer, 40 matahiti ‘e ‘o Vanina Pommier, 35 matahiti. Rāua to’opiti tei ha’a ato’a nā i pīha’i iho i nā fa’aterehau tahito e piti.
‘Ua fa’aoti ‘o Cédric Mercadal e vaiho i tōna ti’ara’a. I rotopū i te mau ti’a’aura’a tei amohia mai e ana, teie ia ‘āma’a RNS. Tumu parau tei fa’ataupupū i te orara’a poritita. ‘Ua fa’aoti te mau mero ‘āpo’ora’a rahi Tāvini Huira’atira, Tāpura ‘āmui ‘e nā ti’a e toru nō A Here ia Pōrīnetia e tu’u hō’ē ‘ōpuara’a nō te fa’a’ore i te ture RNS. Tāpura ‘ohipa o te tuatāpapahia i te 21 nō mē i te fare ‘āpo’ora’a rahi.
– PUBLICITE –
I tōna a’e pae, ‘ua nā reira ato’a o Kainuu Temauri, tei riro ‘ei fa’aterehau nō te tū’aro, te u’i ‘āpī ‘e te rima’ī i te ‘āva’e tiurai 2025. ‘Ahuru ‘āva’e i muri mai, tē fa’aātea nei i te orara’a poritita nō te ho’i i roto i te orara’a tīvira. Fa’aotira’a tei ravehia nō te taimaha o te fa’aineinera’a i te heiva tū’aro nō Pātitifā, hau atu, ‘e’ita te mau mā’ona e fana’o hō’ē vāhi ‘aura’a ‘āpī.
Nō te monora’a ia Cédric Mercadal, ‘ua ineine ‘o Raihei Ansqer nō te amo i te hopoi’a. E taote teie, ‘ua pa’ari i Tubuai ‘e ‘ua ha’a ato’a na i te fare ma’i Ta’aone. I teie tahara’a mahana, e fārerei ‘ona i tō te fare turu’uta’a nō te tuatāpapa i te parau nō te ‘āma’a RNS ‘e i teie mau mahana i muri, ‘aitaui e te mau fatu ‘e tae noa atu i te mau aupupu pāruru rave ‘ohipa. Tē hina’aro ato’a ra ‘ona, e ha’amaita’i i te araira’a, te rapa’aura’a i te mau motu ‘e i Tahiti nei ‘e tae noa atu i te fa’a’ohipara’a i te mau rāve’a natirara nō te ea.
Mai teie atu, nā Vanina Pommier e ti’a’au i te te tū’aro, te u’i ‘āpī ‘e te rima’ī. ‘Ua ha’a ato’a ‘ona nō te fa’aineinera’a i te tata’ura’a hōrue nō te heiva nui i te matahiti 2024 ra hou a ha’apa’o mai ai i te fa’aineinera’a i te heiva tū’aro nō Pātitifā, tārenahia i te matahiti 2027. ‘Ua ha’apāpū ‘ona, ‘e tupu te mau tata’ura’a nō te ‘au i Tīpaeru’i noa atu ‘aita tāua vāhi ‘aura’a e tūea i te mau fa’aturera’a. Tē ti’aturi nei te fa’aterehau e ‘itehia mai hō’ē rāve’a. A farairē, e fārerei atu ‘ona i te tōmite ‘ohipa o te « Pacific games council ».
