Mata ‘oa’oa tō te huimana i teie nei ‘ōro’a. I te mutura’a ihoa te rīpene, ‘ua tāpapa te mau tamari’i i te mau hā’uti tei ha’amauhia i ni’a i teie māhora Toa Huri Nihi. Te fa’ahe’e, te tīrare, te fa’a’ohura’a mai te tamari’i ‘e tae atu i te mau metua, ‘ua ‘oa’oa te tā’ato’araa. I raro, e vauvau ta’a’ē tei tu’uhia, ‘ia ‘ore te mau tamari’i ‘ia mauiui ‘ia topa iho. ‘Eaha ho’i e ‘ore ai, teie te fa’ahe’era’a teitei roa a’e i te fenua nei.

« Mea maitai’ roa ‘e mea ‘oa’oa ato’a nō tā mātou mau tamari’i », i te reo o hō’ē metua vahine. ‘Ia fa’aro’ohia atu hō’ē tamari’i te nā ‘ō ra e, « mea fa’ahiahia roa, mea au roa nā’u te vāhi fa’ahe’era’a ».

Mea pinepine teie mau ha’utira’a i te ‘itehia nā roto i te mau ‘oire. I Uturoa nei ra, a tahi nei ia. Vāhi nahonaho maita’i nō te fa’ari’ira’a i te tā’ato’ara’a mai te mau tamari’i tae atu i te feiā pa’ari. Nō teie patura’a, 37 mirioni farāne te tāpura faufa’a i fa’ata’ahia, amohia hō’ē tuha’a e te ‘oire ‘e te tahi e te fare turu’uta’a. 3 matahiti i te tīa’ira’a ‘e ‘ua tupu.

« Terā ihoa ia mau anira’a, te mau tītorotorora’a. ‘E’ere i te mea ‘ōhie. ‘Ia oti e haere ia e ani i te mau tauturu. Teie ‘ōpuara’a nō Ra’iātea tā’ato’a, ‘e’ere nō Uturoa ana’e », i te reo o Matahi Brotherson, te tāvana nō Uturoa.

E matara teie māhora i te tā’ato’araa o te huira’atira nō Ra’iātea, i te mau hora ‘īritira’a fa’ata’ahia e te ‘oire. Te ani nei te ‘āpo’ora’a ‘oire ‘ia fa’aturahia teie mau fa’a’ana’anataera’a, ‘ia fāna’o maoro te tā’ato’araa.